*LO DAI VE TA CHE*
Nutey Tlau

       "Missionary ka ngaisang,engtik ah emaw in hnung ka la zui ang" min ti maw ???
Mahni in nuam tak kalsanin khawlum leh vaihmite hi i tuar ve peih ang em??
I chhûngte leh i hmangaih em em te i kalsan phal ang maw??
Mahni chauh a khawhar deuh a awm chang i nei dawn,i lungawi zel tho ang em?
I ṭhian i ngaih em em te kha in khua a i haw leh hunah i tan an remchang tawh dawn lo,i rin angin thil a kal tawh lovang,i vui lo ang maw??
I duhzawng zawng zawng i nei thei tawh dawn lo a,i duhzawng pawh a rem loh chuan i kalsan a ngai,a rûk a mittui tla chung leh ui tak chung a i hnial a i hnar hun a awm dawn,i tuar ve peih dawn em ni??
Hmu leh tawh lo turin i mangṭha ve phal ang maw??
Nuam i tih kha i chân phal dawn em ni??

              "Engatinge min va sawi ṭhaih ve" i ti maw???
Krista pawh khan amah zui tumtu kha "Sihal ten kua an nei,mihring fapa erawh chuan lu nghahna a nei lo" tiin a lo chhang asin..
A hriatchian phawt loh chuan a dai sual mai hlau in a kawng zawh tur leh thil awmzia a hrilhfiah a nih kha...

        " A nih leh, engatinge he kawng hi i thlan?" min ti maw....?
Krista hmangaihna in min tir lui a ni..
A tirh luih tan paw'n harsat chang a awm chuan châk vang leh ngaihsan vang chuan lo zawh ve lul suh..
I beisei loh thil i tawn hunah leh tlawmna nun nen a nun a ngaih hunah harsa tiin i inchhir leh mai mai zawk ang..
I culture hriat loh ah i in adjust a ngai ang a,ṭap chung a rawngbawl a ngai a,mahni ṭawng ni lo hmangin,ṭawng dang hmangin hla i sa ang a,i ṭhiante leh i chhungte meuh pawhin an hnem theih loh rilru natna nei chung a i intih chak a ngai dawn asin...
I thei ve dawn em ni??

          Mahse,heng zawng zawng hre chung a i lo pén chhuah a,Pathian rawngbawl i thlang anih chuan maw...
Engkimneitu hian a ti chak che ang a...
Tuarna hmunah a nuihtir che ang a,
Chânna hmunah hlawkna i hmu ang a,
Lungngaihna kârah hlimna i chhar ang..
Vâna i lawmman tur thlir tir che in,khawvel a thil awm hlut loh zia a lo hmuhtir ang che...

*LO DAI VE TA CHE*